Upplifun og reynsla dómþola sem afplánað hafa undir rafrænu eftirliti. „Það er bara fínn díll að afplána dóminn sinn á ökklabandi”

Markmið rannsóknarinnar er að varpa ljósi á upplifun og reynslu einstaklinga sem afplánað hafa undir rafrænu eftirliti og hvernig úrræðið nýttist í aðlögun þeirra að samfélaginu að nýju. Jafnframt að skoða hvaða stuðningur þeim stóð til boða og varpa fram hugmyndum að úrbótum sem viðmælendur telja þörf á. Rannsóknin var framkvæmd með eigindlegri rannsóknaraðferð þar sem tekin voru viðtöl við níu einstaklinga sem eiga það sameiginlegt að hafa afplánað undir rafrænu eftirliti. Einnig voru tekin upplýsingaviðtöl við þrjá fagaðila sem koma að málefnum dómþola sem afplána undir rafrænu eftirliti. Niðurstöður rannsóknarinnar benda til þess að rafrænt eftirlit er mikilvægt úrræði í þrepaskiptri aðlögun dómþola að samfélaginu að nýju. Upplifun viðmælenda af úrræðinu var jákvæð, þeir upplifðu umbun og ákveðið frelsi þegar rafrænt eftirlit hófst og aðlögunin að samfélaginu varð auðveldari fyrir vikið. Viðmælendur telja þó þörf á úrbótum svo úrræðið geti nýst dómþolum enn betur. Helstu tillögur að úrbótum eru aukinn stuðningur við dómþola af hálfu Fangelsismálastofnunar og samstarf við félagsþjónustu sveitarfélaga og aðra aðila sem koma að þjónustu og stuðningi við dómþola með tilliti til möguleika á launaðri atvinnu, menntun og endurhæfingu